Novelli / Stejjer Qosra by Jane Micallef

NOVELLI

Biċċa minn hawn, u biċċa minn hemm, tilqit minn memorji tat-tfulija, minn esperjenzi personali jew minn dak li smajt, ġbart u ssellift minn fomm ħaddieħor, stejjer imżewqa b’realtajiet storiċi riċerkati u fatti oħra veri, bnew din il-ġabra ta’ stejjer qosra. Uħud huma minsuġa minn sempliċi fantasija ħielsa minn kull lġiem, li timraħ fid-dinja tal-ħolm u toħloq dak li l-immaġinazzjoni tiddetta.

Uħud jinkludu karattri ta’ diversi persuni li stajt nosserva jew niltaqa’ magħhom tul il-mixja tas-snin. B’kuntrast ma’ l-istejjer mibnija fuq tema leġġera, oħrajn jinkludu ġrajjiet ta’ realtajiet ta’ swied il-qalb, ħarxa u xi drabi krudili.

U jgħaqqad dawn il-biċċiet ta’ mużajk imżewwaq li bħal kalamiti nġibdu lejn xulxin biex twieldu dawn il-ħdax-il novella, is-siment iġġenerat mill-immaġinazzjoni.

STEJJER QOSRA

Dettalji żgħar imfittxija fost it-tifkiriet tat-tfulija, esperjenzi personali, stejjer miġbura minn sorsi varji u laqgħat personali ma’ diversi persuni tawni l-materjal biex insiġ din il-ġabra ta’ stejjer.

Uħud minn dawn huma frott ta’ fantasija safja u kkulurita, filwaqt li oħrajn huma mibnija fuq ġrajjiet ta’ realtà ħarxa. Dawn saħħaħthom b’riċerka storika, osservazzjoni u esperjenza personali, u rakkonti diretti ta’ ġrajjiet veri.

Biċċiet ta’ mużajk manjetiku li nġibdu lejn xulxin taw il-ħajja lil din il-ġabra ta’ 11-il storja qasira, magħqudin flimkien bl-ingredjent li jgħaqqad: l-immaġinazzjoni kreattiva.