Francesco Azopardi (1748-1809) by Dion Buhagiar

Matul l-aħħar ftit snin, inħoloq aktar interess u domanda għall-esekuzzjoni tal-mużika ta’ Francesco Azopardi, partikolarment minn mużiċisti Maltin, korijiet u orkestri Ewropej. Is-saħħa tal-mużika ta’ Azopardi tinsab fil-fatt li dejjem inkitbet b’għan jew kommemorazzjoni speċifika f’moħħu – bħall-famuża Requiem Mass f’F minuri (1792) li kienet ikkummissjonata għall-mewt tar-Re Leopold II tal-Awstrija. Il-ktieb juri lil Azopardi bħala kompożitur prolifiku li kien f’kuntatt mal-ideat ewlenin tal-aktar ċentri mużikali Ewropej importanti bħal Napli, Pariġi u Monaco di Baviera (Munich), fost postijiet oħra. Azopardi kkompona diversi xogħlijiet akbar bħall-Oratorju La Passione di Cristo, tliet Grande Messe għal żewġ korijiet, solisti u żewġ orkestri, b’arji u korijiet li jirriflettu l-istil operistiku Naplitan ta’ Nicola Piccinni u Giovanni Battista Pergolesi, kif ukoll għadd kbir ta’ salmi, te deums, innijiet solenni u sekwenzi. Kien hemm ukoll tentattivi ta’ editjar u pubblikazzjoni, esekuzzjoni u reġistrazzjoni tal-mużika strumentali tiegħu, speċjalment is-sinfoniji (forma qasira ta’ sonata-da-chiesa).

Id-dedikazzjoni mużikali ta’ Azopardi, madankollu, kienet diretta lejn il-kompożizzjoni ta’ mużika għall-katidral, f’konkordanza mar-rwol tiegħu ta’ Maestro di Cappella, kif ukoll it-tagħlim tal-kompożizzjoni permezz tat-trattati tiegħu stess: Il Musico Prattico (I) u Il Musico Pratico (II). Dawn iż-żewġ trattati huma analizzati hawnhekk bl-aħħar verżjoni estiża ta’ Il Musico Pratico f’erba’ kotba. Dawn iż-żewġ trattati importanti huma ppreżentati hawnhekk għall-ewwel darba fil-perspettiva storika xierqa tagħhom li tinkludi wkoll studju komparattiv u analiżi tat-tnejn.