Ilni nbati mill-OCD (Disturb Ossessiv-Kompulsiv) minn kemm ili niftakar u l-kitba ta’ dan il-ktieb għenitni nlaħħaq miegħu. Sibt li kien terapewtiku ħafna li nniżżel bil-miktub l-affarijiet koroh kollha li kienu qed jiġruli, sabiex ninfired minnhom u nipprova nara l-affarijiet minn perspettiva ġdida. Nispera li dan il-ktieb jgħin lill-qarrejja tiegħi bl-istess mod, u jkun terapewtiku għal dawk li jaqrawh. Għal ħafna snin id-disturb tiegħi ma kellux isem, iżda l-OCD xorta kien qed jaffettwa miljuni ta’ nies bħali mad-dinja kollha. Illum il-ġurnata, in-numru ta’ persuni li jbatu mill-OCD għadu qed jiżdied. Iktar ma wieħed isir infurmat dwar id-disturb, iktar ikollu munizzjon biex jiġġilidlu, jew jitgħallem jgħix miegħu. L-OCD forsi għadu ma qatilnix, imma żgur li ħakem ħajti u għamel l-eżistenza tiegħi battalja kostanti. Kont nagħti kollox biex neħles minnu. Sew jekk tbati minn tendenzi ħfief ta’ OCD, jew jekk tiġġieled każ sever ta’ OCD, dan il-ktieb jista’ jkun ta’ għajnuna għalik u għal oħrajn biex tidentifikaw il-fatt u tirrealizzaw li m’intomx waħedkom fit-tbatija tagħkom u jinkoraġġikom biex tfittxu l-għajnuna. Meta t-tfittxija tagħna għall-perfezzjoni tikkompeti mal-ferħ li ngħixu fil-preżent u issa, il-ferħ jintefa. Li ssib il-bilanċ it-tajjeb hija dejjem l-isfida.
